మెదక్: నర్సాపూర్ డివిజన్ సహాయ వ్యవసాయ సంచాలకులు ఆర్.సంధ్యారాణి రైతులకు యూరియా వినియోగంపై పలు సూచనలు చేశారు. ఒక పంట కాలానికి ఎకరానికి రెండు బస్తాల యూరియా మాత్రమే అవసరమని, అంతకంటే ఎక్కువ వాడితే పురుగులు, వ్యాధులు వచ్చే అవకాశం ఉందని తెలిపారు. యూరియా వాడిన తర్వాత నానో యూరియా వాడితే పంట ఆరోగ్యంగా పెరిగి పెట్టుబడి తగ్గి, దిగుబడి పెరుగుతుందని వివరించారు.
మహబూబాబాద్: జిల్లా కేంద్రంలో మానుకోట ఫోటో అండ్ వీడియో గ్రాఫర్ అసోసియేషన్ ఆధ్వర్యంలో ప్రపంచ ఫోటోగ్రాఫర్ దినోత్సవాన్ని ఘనంగా నిర్వహించారు. కార్యక్రమంలో ముఖ్యఅతిథిగా సంఘం జిల్లా అధ్యక్షుడు తోట సుభాష్ పాల్గొని సంఘ జెండా ఆవిష్కరించారు. అనంతరం ఆయన మాట్లాడుతూ.. భవిష్యత్ ,వర్తమాన తరాలకు సజీవ సాక్ష్యం ఫోటో అని కొనియాడారు.కార్యక్రమంలో అసోసియేషన్ సభ్యులు, ఫోటోగ్రాఫర్లు పాల్గొన్నారు.
ఆదిలాబాద్: తాంసీ మండలంలో కురిసిన భారీ వర్షాలకు నీట మునిగిన పంట పొలాలను మంగళవారం మండల వ్యవసాయ అధికారి రవీందర్ పరిశీలించారు. ఈసందర్భంగా ఆయన మాట్లాడుతూ.. వరదలకు నష్టపోయిన పంటలను ప్రాథమిక సర్వే నిర్వహించి ప్రభుత్వానికి నివేదిక అందజేస్తామని తెలిపారు. సర్వే కార్యక్రమంలో మండల వ్యవసాయ అధికారితో పాటు మాజీ సర్పంచ్ రత్న ప్రకాష్‌, తదితరులు పాల్గొన్నారు.
జనగామ: స్టేషన్ ఘన్‌పూర్‌ పీఏసీఎస్ ఆధ్వర్యంలో మంగళవారం రైతులకు బయోమెట్రిక్, ఓటీపీ ద్వారా యూరియా బస్తాలను అధికారులు అందజేశారు. ఈసందర్భంగా పలువురు రైతులు మాట్లాడుతూ.. ఎంత భూమి ఉన్నా కేవలం రెండు బస్తాలు మాత్రమే ఇస్తున్నారని, తమకు ఏం చేయాలో అర్థం కావడం లేదని ఆవేదన వ్యక్తం చేశారు. యూరియా కొనుగోలుకు ఆధార్, వేలిముద్రలు ఎందుకు అని రైతులు ప్రశ్నించారు.
మహబూబాబాద్: జిల్లాలో రైతుల అవసరాలకు అనుగుణంగా యూరియాను అందుబాటులోకి తెప్పించడానికి ప్రతిపాదనలు పంపించామని కలెక్టర్ అద్వైత్ కుమార్ సింగ్ తెలిపారు. ఈసందర్భంగా కలెక్టరేట్‌లో ఏర్పాటు చేసిన సమావేశంలో ఆయన మాట్లాడుతూ.. జిల్లాలో రైతులకు యూరియా కొరత లేకుండా చూడాలని, ప్రాథమిక వ్యవసాయ సహకార సొసైటీలు, ఆగ్రోస్ దుకాణాలు, ప్రైవేటు షాపుల ద్వారా విక్రయాలు జరిగేలా చూడాలని అధికారులను ఆదేశించారు.
మహబూబాబాద్: బయ్యారం చెరువు మంగళవారం ప్రమాదకర స్థితిలో మత్తడి పోసింది. ఈసందర్భంగా పలువురు అధికారులు మాట్లాడుతూ.. మత్తడి ప్రదేశానికి పర్యాటకులు ఎవరూ రావద్దని సూచించారు. భారీ వర్షాల కారణంగా పాత ఇర్సులాపురం గ్రామానికి చెందిన తాటి సత్యవతి అనే మహిళ తన ఇంటిని కోల్పోయింది. ప్రభుత్వం స్పందించి తమ కుటుంబాన్ని ఆదుకోవాలని కన్నీటిపర్యంతం అయ్యారు.
జయశంకర్ భూపాలపల్లి: సింగరేణి ఏరియాలో కురుస్తున్న భారీవర్షాల కారణంగా ఓపెన్ కాస్ట్ ప్రాజెక్టులోని 2, 3వ గనుల్లో మంగళవారం బొగ్గుఉత్పత్తి, మట్టి వెలికితీత పనులు నిలిచిపోయాయి. అధికారులు మాట్లాడుతూ.. సుమారు 4 వేల టన్నుల బొగ్గు ఉత్పత్తి నిలిచిపోవడంతో సంస్థకు రోజుకు రూ. 2 కోట్ల మేర నష్టం వాటిల్లిందని తెలిపారు. వరద నీరు చేరడం, పని స్థలాలు బురదమయం కావడంతో ఎక్కడి పనులు అక్కడే నిలిచిపోయాయి.
వరంగల్: రాయపర్తి ప్రాథమిక వ్యవసాయ సహకార సంఘం (పీఏసీఎస్) కేంద్రాన్ని జిల్లా కలెక్టర్ సత్య శారద, జిల్లా వ్యవసాయ అధికారి అనురాధ మంగళవారం పరిశీలించారు. ఈసందర్భంగా పలువురు రైతులు పీఏసీఎస్ కేంద్రాల వద్ద తమకు సరిపడా యూరియా లభించడం లేదని కలెక్టర్‌కు ఫిర్యాదు చేశారు. ఫర్టిలైజర్ షాపులలో యూరియాతో పాటు ఇతర ఎరువులను లింకు పెట్టి అమ్ముతున్నారని ఆవేదన వ్యక్తం చేశారు.
మెదక్: కౌడిపల్లి మండలంలోని మహాత్మ జ్యోతిబాఫులే ప్రభుత్వ పాఠశాలలో నులిపురుగు నివారణ దినోత్సవ కార్యక్రమం నిర్వహించారు. కార్యక్రమానికి ముఖ్యఅతిథిగా నర్సాపూర్ ఎమ్మెల్యే సునీత లక్ష్మారెడ్డి హాజరయ్యారు. ఈసందర్భంగా ఆమె మాట్లాడుతూ.. విద్యార్థులు వ్యక్తిగత శుభ్రతను పాటించాలని, తప్పకుండా ప్రతిఒక్కరూ నులిపురుగుల నివారణ మందులు వేసుకోవాలన్నారు. అనంతరం వారికి ఆల్ఫెండ జోల్ మాత్రలు పంపిణీ చేశారు. కార్యక్రమంలో పలువురు ఉపాధ్యాయులు, విద్యార్థులు పాల్గొన్నారు.
మెదక్: జిల్లా వ్యాప్తంగా ఉదయం 8:00 వరకు కురిసిన వర్షపాతం వివరాలను వాతావరణ శాఖ అధికారులు వెల్లడించారు. అత్యధికంగా కాగజ్ మద్దూర్ 62.8 మి.మీ, దామరంచ 59.3 మి.మీ, మిన్పూర్ 46 మి.మీ, నర్సాపూర్ 503.3 మి.మీ, నాసాయిపేట 50 మి.మీ, వెల్దుర్తి 46 మి.మీ, సోంపేట 43.5 మి.మీ, నర్లాపూర్ 43.3 మి.మీ, కొల్చారం 41 మి.మీ, చెప్పులుదూతి 40.8 మి.మీ.. తదితర ప్రాంతాల్లో కురిసింది. ప్రజలందరూ అప్రమత్తంగా ఉండాలని అధికారులు సూచించారు.
