మంచిర్యాల: చెన్నూరు మండలం శివలింగాపూర్‌కు చెందిన అంబులెన్స్ డ్రైవర్ కాటేల కృష్ణస్వామి 2019లో పదోతరగతి విద్యార్థినిని బెదిరించి, బలవంతంగా స్కూటీపై తీసుకెళ్లాడు. ఘటనపై బాధితురాలి తల్లిదండ్రులు పోలీసులకు ఫిర్యాదు చేయగా కేసునమోదు చేశారు. నేరంరుజువు కావడంతో పోక్సోకేసులో నేరస్థుడికి మూడేళ్ల జైలుశిక్ష, రూ.1500 జరిమానాతో పాటు బాధితురాలికి రూ.లక్ష నష్టపరిహారం ఇవ్వాలని జిల్లా కోర్టు అదనపు న్యాయమూర్తి ఎల్. శ్రీనివాస్ తీర్పు వెలువరించారు.
మెదక్: మనోహరాబాద్‌లోని 132-కేవీ ఉప కేంద్రంలో వర్షం పడి మంటలు చెలరేగడంతో పాడైందని, ప్రత్యేక డ్రైవ్ చేపట్టి బాగు చేయిస్తామని కాళ్లకల్ ఉపకేంద్రం ఏఈ రాజ కుమార్ తెలిపారు. ఈనేపథ్యంలో గురువారం ఉదయం 10.30 నుంచి 1.30 గంటల వరకు తూప్రాన్, మనో‌హరాబాద్, మాసాయిపేట మండలాల పరిధిలో విద్యుత్తు సరఫరాలో అంతరాయం ఉంటుందని ప్రజలు గమనించాలని కోరారు. వినియోగదారులు గమనించి సిబ్బందికి సహకరించాలన్నారు.
ఖమ్మం: తల్లాడలో జులై 24న డెంగీ లక్షణాలతో యోగాటీచర్ మృతి చెందగా.. అదే కుటుంబానికి చెందిన ఆమె కుమార్తె, మేనల్లుడు డెంగీ లక్షణాలతో తీవ్రఅస్వస్థతకు గురయ్యారు. విషయం సీఎంఓ దృష్టికి వెళ్లడంతో సీఎస్ రామకృష్ణారావు జిల్లా ఉన్నతాధికారులను విచారణకు ఆదేశించారు. అదనపు కలెక్టర్ శ్రీజ విచారణ జరిపి నివేదికను సమర్పించారు. ఈక్రమంలో తల్లాడ పీహెచ్‌సీ వైద్యాధికారి ఐ.రత్నమనోహర్‌ను సస్పెండు చేస్తూ ఉత్తర్వులు అందాయి.
జనగామ: జిల్లాలో గురువారం స్టేట్ బీజేపీ చీఫ్ రామచందర్రావు పర్యటించనున్నట్లు ఆ పార్టీ జిల్లా అధ్యక్షుడు సౌడ రమేశ్ ఒక ప్రకటనలో తెలిపారు. స్థానిక బస్టాండు నుంచి జూబ్లీ వేడుకల మందిరం వరకు పార్టీ శ్రేణుల ఆధ్వర్యంలో ర్యాలీ నిర్వహించనున్నట్లు పేర్కొన్నారు. అనంతరం బహిరంగ సభలో కార్యకర్తలను ఉద్దేశించి ఆయన ప్రసంగిస్తారని వెల్లడించారు. కార్యక్రమంలో పెద్దసంఖ్యలో పార్టీ శ్రేణులు, ప్రజలు పాల్గొనాలని పిలుపునిచ్చారు.
హన్మకొండ: కాజీపేట మండలంలోని మడికొండ పాత పోలీస్ స్టేషన్ సమీపంలో హెడ్ కానిస్టేబుల్ జయరాజ్ వ్యవసాయ రైతులతో మాట్లాడారు. వ్యవసాయ రైతులు అప్రమత్తంగా ఉండాలని సూచించారు. ఇటీవల కాలంలో మడికొండ పోలీస్ స్టేషన్ పరిధిలో వ్యవసాయ భూముల వద్ద ట్రాన్స్‌ఫార్మర్లను, కాపర్ వైర్లను గుర్తు తెలియని దొంగలు అపహరించి ఎత్తుకెళ్తున్నారని, అలాంటి ఘటనలు మీ దృష్టికి వస్తే సమాచారం ఇవ్వవలి సూచించారు.
ఆదిలాబాద్: ఆదిలాబాద్ పట్టణ స్వర్ణకారుల సంఘం ఆధ్వర్యంలో బుధవారం స్థానికంగా తెలంగాణ సిద్ధాంతకర్త, ప్రొఫెసర్ జయశంకర్ సర్ జయంతి వేడుకలు ఘనంగా నిర్వహించారు. కార్యక్రమంలో ముఖ్యఅతిథిగా సంఘం అధ్యక్షుడు ఉదారి నాగేష్ పాల్గొని సంఘం సభ్యులతో కలిసి జయశంకర్ విగ్రహానికి నివాళులర్పించారు. అనంతరం ఆయన మాట్లాడుతూ.. స్వరాష్ట్ర సాధన కోసం జయశంకర్ సర్ చేసిన కృషి మరువలేనిదని అన్నారు. కార్యక్రమంలో సంఘంసభ్యులు పాల్గొన్నారు.
ఖమ్మం: ఆలయంలో హుండీని చోరీ చేసిన ఘటన బుధవారం కామేపల్లి మండలం తాళ్లగూడెం గ్రామంలోని గోపయ్య సమేత శ్రీ లక్ష్మీ తిరుపతమ్మ తల్లి దేవస్థానంలో వెలుగుచూసింది. బుధవారం ఉదయం ఆలయానికి వెళ్లి చూడగా హుండీ ధ్వంసం చేసి ఉండటాన్ని గమనించిన ఆలయ కమిటీ సభ్యులు పోలీసులకు ఫిర్యాదు చేశారు. కేసు నమోదు చేసి దర్యాప్తు చేస్తున్నట్లు పోలీసులు తెలిపారు.
మహబూబాబాద్: రెండు కారులు ఎదురెదురుగా ఢీకొన్న ప్రమాదంలో ముగ్గురు డాక్టర్లకు తీవ్రగాయాలైన ఘటన బుధవారం మహబూబాబాద్ మండలం కంభాలపల్లి శివారులో నేషనల్ హైవేపై చోటుచేసుకుంది. మహబూబాబాద్ జిల్లా ఆస్పత్రిలో పనిచేస్తున్న ముగ్గురు డాక్టర్లు రామ్మోహన్, అశోక్ రెడ్డి, నితీష్ కుమార్‌లు వరంగల్ నుంచి కారులో డ్యూటీకి వస్తున్న క్రమంలో ఈ ప్రమాదం చోటుచేసుకుంది. ఘటనపై దర్యాప్తు చేస్తున్నట్లు పోలీసులు తెలిపారు.
హన్మకొండ: నర్సంపేట మాజీ ఎమ్మెల్యే పెద్ది సుదర్శన్ రెడ్డి జన్మదినం సందర్బంగా బుధవారం బీఆర్ఎస్ పార్టీ శ్రేణులు సంబరాలు చేశారు. ఈసందర్భంగా బాలసముద్రంలోని బీఆర్ఎస్ జిల్లా కార్యాలయంలో పార్టీ జిల్లా అధ్యక్షులు దాస్యం వినయ్ భాస్కర్ ఆధ్వర్యంలో పెద్ది సుదర్శన్ రెడ్డితో కేక్ కట్ చేయించి విశేష్ చెప్పారు. కార్యక్రమంలో బీఆర్ఎస్ పార్టీ నాయకులు, కార్యకర్తలు, తదితరులు పాల్గొన్నారు.
ఆదిలాబాద్: ఓ యువకుడు ఉరేసుకొని ఆత్మహత్యాయత్నానికి పాల్పడిన ఘటన ఇచ్చోడా మండలంలోని అశోక్ నగర్‌లో వెలుగుచూసింది. అశోక్‌నగర్‌‌కు చెందిన సతీష్ (32) అనే యువకుడు మంగళవారం సాయంత్రం ఇంట్లో ఉరేసుకొని ఆత్మహత్యకు పాల్పడ్డాడు. గమనించిన కుటుంబ సభ్యులు వెంటనే 108 అంబులెన్స్‌లో ఆస్పత్రికి తరలించారు. సకాలంలో స్పందించిన అంబులెన్స్ సిబ్బందికి కుటుంబ సభ్యులు కృతజ్ఞత తెలిపారు. ప్రస్తుతం యువకుడు చికిత్స పొందున్నాడు.
