సినీ కార్మికుల వేతనాల పెంపు అంశం ప్రస్తుతం ఇండస్ట్రీలో హాట్‌టాపిక్‌గా మారిన సంగతి తెలిసిందే. ఈ క్రమంలో మెగాస్టార్ చిరంజీవి స్పందించారు. శనివారం తనని సినీ కార్మికులు కలిశారంటూ వచ్చిన వార్తల్లో నిజం లేదని స్పష్టం చేశారు. తన మూవీ షూటింగ్‌ కార్మికులకు వేతనం పెంచి ఇస్తామని చిరంజీవి హామీ ఇచ్చారంటూ వస్తున్న వార్తలను ఖండించారు. ఈ మేరకు ఎక్స్‌ వేదికగా పోస్ట్ పెట్టారు.
హృతిక్‌ రోషన్‌,ఎన్టీఆర్‌, కియారా అడ్వాణీ కీలక పాత్రల్లో అయాన్‌ ముఖర్జీ దర్శకత్వంలో రూపొందిన స్పై యాక్షన్ థ్రిల్లర్‌ ‘వార్‌-2’.ఆగస్టు 14న మూడు భాషల్లో విడుదల కానుంది. ఒక్కో భాషలో ఒక్కో రన్‌టైమ్‌తో వస్తుండటం గమనార్హం. సీబీఎఫ్‌సీ ఈ మూవీకి యూ/ఏ సర్టిఫికెట్‌ ఇచ్చింది. హిందీ రన్టైమ్ 2 గంటల 53 నిమిషాల, 24 సెకన్లు కాగా.. తెలుగు, తమిళ భాషల్లో 2 గంటల 51 నిమిషాల 44 సెకన్లుగా మేకర్స్ నిర్ణయించారు.
దుల్కర్‌ సల్మాన్‌, భాగ్యశ్రీ బోర్సే జంటగా తెరకెక్కుతున్న చిత్రం ‘కాంత’. సెల్వమణి సెల్వరాజ్‌ దర్శకుడు. దుల్కర్‌తో కలిసి హీరో రానా తదితరులు ఈ చిత్రాన్ని నిర్మిస్తున్నారు. ప్రమోషన్స్‌లో భాగంగా ఈ చిత్ర నుంచి ‘పసి మనసే.. వినదసలే’ అంటూ సాగే రొమాంటిక్ మెలోడిని మేకర్స్ విడుదల చేశారు. జాను చంతర్‌ స్వరాలు అందించగా.. ప్రదీప్‌కుమార్‌, ప్రియాంక ఎన్‌కే ఆలపించారు.
ఈనెల 14న ప్రేక్షకులను పలకరించడానికి ‘కూలీ’ సిద్ధమయ్యాడు. రజనీకాంత్‌ హీరోగా లోకేశ్‌ కనగరాజ్‌ తెరకెక్కించిన చిత్రం ‘కూలీ’. ఇటీవలే ఈ మూవీకి సెన్సార్‌బోర్డు ‘ఏ’ సర్టిఫికేట్ జారీ చేసింది. ఇక మొత్తం సినిమా రన్టైమ్ 2 గంటల 50 నిమిషాలకు లాక్ చేసినట్లు తెలుస్తోంది. రజనీకాంత్‌ సినిమాల్లోకి వచ్చి 50ఏళ్లు పూర్తయిన సందర్భంగా 25 సెకన్ల నిడివి గల స్పెషల్ వీడియోను కూడా ఈ సందర్భంగా ప్రదర్శించనున్నారు.
సినీనేపథ్యం లేకపోతే ఇండస్ట్రీలో అవకాశాలు రావడం కష్టమని నటి మౌనీరాయ్‌ తెలిపింది. తాజాగా ఈ అమ్మడు ఓ ఇంటర్వ్యూలో మాట్లాడుతూ.. ఫిల్మ్ ఇండస్ట్రీలో బయటి వ్యక్తులు ఎదుర్కొంటోన్న సవాళ్ల గురించి ప్రస్తావించింది. ప్రతిభ ఉన్నప్పటికీ అవకాశాలు రావని.. వాటిని పొందడం ఎంతో కష్టమని చెప్పుకొచ్చింది. ‘బ్రహ్మాస్త్ర’ తర్వాత తనకు ఎన్నో అవకాశాలు వస్తాయని అనుకున్ననని.. కానీ, ఆ సినిమా విజయం తనకు ఛాన్సులు తీసుకురాలేదని వెల్లడించింది.
నేడు సూపర్‌స్టార్ మహేశ్‌ బాబు పుట్టినరోజు. ఈ సందర్భంగా ఆయన కుమార్తె సితార స్పెషల్ విష్ తెలుపుతూ.. ఫొటో షేర్ చేసింది. తన నాన్నతో చిన్నప్పుడు దిగిన క్యూట్ ఫొటోను షేర్ చేస్తూ.. ‘హ్యాపీ బర్త్‌డే బెస్ట్ డ్యాడ్ ఎవర్.. లవ్ యు’ అనే క్యాప్షన్ జోడించింది. దీంతో ఈ పోస్ట్ కాస్త నెట్టింట వైరల్‌గా మారింది.
రాఖీ పండుగ సందర్భంగా మెగా డాటర్ నిహారిక కొణిదెల షేర్ చేసిన పోస్ట్ నెట్టింట వైరల్‌గా మారింది. తన సొంత అన్న వరుణ్ తేజ్, పెద్దనాన్న మెగాస్టార్ తనయుడు రామ్ చరణ్‌లతో ఈ రాఖీ పండుగ జరుపుకున్నట్టుగా పిక్స్ పంచుకుంది. ఈ రాఖీ పండుగకి మరింత ప్రేమను ఫీల్ అవుతున్నానని తెలిపింది. ఇవి చూసిన అభిమానులు మరింత ఆనందం వ్యక్తం చేస్తున్నారు.
TG: సినీకార్మికులకు వేతనాల పెంపుపై మంత్రి కోమటిరెడ్డి వెంకట్‌రెడ్డి స్పందించారు. వారికి వేతనాలు పెంచితే తప్పేంటని ఆయన ప్రశ్నించారు. కార్మికులపై కేసులు పెడితే ఊరుకోమని హెచ్చరించారు. ‘‘మన కార్మికుల్లో నైపుణ్యం లేదంటే ఒప్పుకోను. నిర్మాతలను కలిసి వేతనాలు పెంచేందుకు కృషి చేస్తా. ఇందుకు ఈ నెల 11న ఇరువర్లాలతో చర్చలు జరుపుతాం’’ అని మంత్రి తెలిపారు.
నటుడు రవితేజ, శ్రీలీల జోడీగా భాను భోగవరపు తెరకెక్కించిన చిత్రం ‘మాస్‌ జాతర’. ఈ సినిమా నుంచి విడుదలైన రెండు పాటలు ప్రేక్షకులను ఆకట్టుకుంటున్నాయి. నాగవంశీ నిర్మిస్తున్న ఈ చిత్రం నుంచి కొత్త అప్‌డేట్‌ వచ్చింది. ఆగస్టు 11న ఉదయం 11.08 గంటలకు ఈసినిమా టీజర్‌ను రిలీజ్ చేస్తున్నట్లు మూవీ మేకర్స్ తెలిపారు. వినాయక చవితి కానుకగా ఈనెల 27న ధియేటర్లలో రిలీజ్ అవుతుంది.
రామ్‌చరణ్‌ హీరోగా దర్శకుడు బుచ్చిబాబు తెరకెక్కిస్తున్న సినిమా ‘పెద్ది’. జాన్వీ కపూర్‌ హీరోయిన్‌గా నటిస్తున్న ఈ చిత్రానికి ఏఆర్‌ రెహమాన్‌ సంగీతం అందిస్తున్నారు. అయితే, సమంత స్పెషల్ సాంగ్‌లో కనిపించనున్నట్లు వార్తలు వస్తున్నాయి. దీనిపై చిత్ర యూనిట్ నుంచి అధికారిక ప్రకటన ఇంకా రాలేదు. కానీ, ఈ వార్త అభిమానుల్లో ఆసక్తిని పెంచుతోంది.
