Category: ఎంటర్‌టైన్‌మెంట్

కమల్‌హాసన్-మణిరత్నం కాంబోలో తెరకెక్కిన చిత్రం ‘థగ్ లైఫ్’. ఈమూవీ నిన్న తెలుగు, తమిళంలో విడుదలై పాజిటివ్ టాక్ తెచ్చుకోలేకపోయింది. ఈ సినిమాకు తొలిరోజు ఓ మాదిరి కలెక్షన్స్ వచ్చాయి. దేశవ్యాప్తంగా రూ.17 కోట్ల నెట్ వసూళ్లు వచ్చాయని తెలుస్తోంది. తెలుగు రాష్ట్రాల్లో మొదటిరోజు రూ.కోటి షేర్ కూడా రాలేదని అంటున్నారు. కమల్-మణిరత్నం కాంబోకి ఇది చాలా తక్కువ మొత్తం అని చెప్పొచ్చు.

బాలీవుడ్ హీరోయిన్‌ షాజన్ పదమ్సీ పెళ్లి చేసుకుంది. మూవీ మాక్స్ సినిమా సీఈఓ ఆశిష్ కనకియా.. షాజన్‌కి కొన్నాళ్ల పాటు డేటింగ్ చేసి.. ఇప్పుడు అతికొద్ది మంది సన్నిహితుల సమక్షంలో ముంబైలో పెళ్లి చేసుకున్నారు. జూన్ 5న అంటే గురువారం రాత్రి వీరి వివాహ వేడుక జరిగింది. జూన్ 7న రిసెప్షన్ జరగనుంది. ఇక షాజన్ టాలీవుడ్‌లో ‘ఆరెంజ్’,‘మసాలా’ చిత్రాల్లో హీరోయిన్‌గా నటించింది.

ప్రభాస్-మారుతి కాంబోలో తెరకెక్కుతున్న చిత్రం ‘ది రాజాసాబ్’. ఈమూవీని పీపుల్ మీడియా ఫ్యాక్టరీపై టీజీ.విశ్వప్రసాద్ నిర్మిస్తున్నారు. అయితే ఈ సినిమా కోసం ప్రభాస్ తన రెమ్యునరేషన్ రూ.150 కోట్లు కాకుండా రూ.100 కోట్లే తీసుకుంటున్నాడట. ఎందుకంటే.. గతంలో ప్రభాస్ నటించిన ‘ఆదిపురుష్’ చిత్రంతో ఈ నిర్మాత నష్టాలను చవిచూశారు. అందుకే ఆయన కోసం ప్రభాస్ తన రెమ్యునరేషన్ తగ్గించినట్లు తెలుస్తోంది.

పవన్‌ కల్యాణ్‌ హీరోగా నటిస్తోన్న సరికొత్త చిత్రం ‘హరిహర వీరమల్లు’.  జూన్‌ 12న ఇది విడుదలవుతుందని భావించిన అభిమానులకు మరోసారి నిరాశ ఎదురైంది. ‘హరిహర వీరమల్లు’ మరోసారి వాయిదా పడినట్లు టీమ్‌ తాజాగా అధికారికంగా ప్రకటించింది. అంతేకాకుండా త్వరలోనే ట్రైలర్‌ రిలీజ్‌ కానుందని.. కొత్త విడుదల తేదీని కూడా ప్రకటిస్తామని టీమ్‌ వెల్లడించింది.

కోలీవుడ్ హీరో రవి ,కెనీషా  కలిసి మురుగన్ దేవాలయంలో దిగిన ఫొటోలు ప్రస్తుతం సోషల్ మీడియా అంతటా వైరల్‌గా మారాయి. వీరి మెడలో పూల దండలు కనిపించడంతో, “పెళ్లి చేసుకున్నారా?” అంటూ నెటిజన్లు పెద్ద ఎత్తున కామెంట్స్​ చేస్తున్నారు.  గతేడాది  రవి తన భార్య ఆర్తితో విడాకులు తీసుకుంటున్నట్టు ప్రకటించిన సంగతి తెలిసిందే. ఆర్తితో విడాకుల వెనుక కెనీషాతో ఉన్న సంబంధమే కారణమని వార్తలు వచ్చాయి.