HYD: IPO అలాట్‌మెంట్ పేరుతో మోసాలకు పాల్పడుతున్న బొబ్బారి శ్రీనివాసరావు(34)ని హైదరాబాద్ సైబర్ క్రైమ్ పోలీసులు అరెస్ట్ చేశారు. ఇతనిపై దేశవ్యాప్తంగా 19కేసులు నమోదయ్యాయి. యాక్సిస్ సెక్యూరిటీ పేరుతో 63ఏళ్ల బాధితుడిని నమ్మించి, క్వాలిఫైడ్ ఇన్‌స్టిట్యూషనల్ ప్లేస్‌మెంట్ కోటాలో షేర్లు కేటాయించినట్లు నమ్మబలికి రూ.43లక్షలు మోసం చేశాడు. నిందితుడి వద్ద నుంచి 2ఫోన్లు, సిమ్‌కార్డులు, పాస్‌బుక్‌లు, డెబిట్‌కార్డులు, చెక్‌బుక్‌లను పోలీసులు స్వాధీనం చేసుకున్నారు.
జనసేన అధినేత పవన్ కళ్యాణ్ పుట్టినరోజైన సెప్టెంబర్ 2నే, బీఆర్ఎస్ ఎమ్మెల్సీ కవిత పార్టీ నుంచి సస్పెన్షన్‌కు గురవడం రాజకీయంగా ఆసక్తికరంగా మారింది. గతంలో “పవన్ కళ్యాణ్ సీరియస్ పాలిటిషియన్ కాదు” అని కవిత చేసిన వ్యాఖ్యలను జనసేన శ్రేణులు గుర్తుచేస్తున్నాయి. తమ నాయకుడిపై విమర్శలు చేసిన కవితకు, ఆయన పుట్టినరోజే ఇలా జరగడం ‘కర్మ ఫలం’, ‘సరైన బర్త్‌డే గిఫ్ట్’ అంటూ గతంలోని వీడియోలను షేర్ చేస్తున్నారు.
HYD: రైల్ నిలయంలో దక్షిణ మధ్య రైల్వే జీఎం సంజయ్ కుమార్ శ్రీవాస్తవతో చేవెళ్ల ఎంపీ కొండా విశ్వేశ్వర్ రెడ్డి భేటీ అయ్యారు. ఈ సమావేశంలో ఆయన తన నియోజకవర్గంలోని రైలు అభివృద్ధి పనులు, ఇతర పెండింగ్ ప్రాజెక్టులపై చర్చించారు. తన ప్రాంతంలోని రైల్వే సమస్యలను పరిష్కరించాల్సిందిగా ఎంపీ జీఎంను కోరారు. రైల్వే మౌలిక సదుపాయాల అభివృద్ధిపై కూడా చర్చించినట్లు తెలిపారు.
హైదరాబాద్‌లో వర్షం మళ్లీ షురూ కావడంతో జీహెచ్ఎంసీ, హైడ్రా, పోలీసులు అప్రమత్తమయ్యారు. ట్రాఫిక్ పోలీసులు వాహనాల రద్దీని క్లియర్ చేస్తున్నారు. నీరు నిల్వ ఉండే ప్రాంతాలు, లోతట్టు ప్రాంతాల్లో జీహెచ్ఎంసీ అధికారులు చర్యలు చేపట్టారు. నగరానికి భారీ వర్ష సూచన ఉండటంతో సిటీ ప్రజలకు, జీహెచ్ఎంసీ అధికారులు, పోలీసులు కీలక సూచన చేశారు. అవసరమైతేనే ఇండ్ల నుంచి బయటకు వెళ్లాలని సూచించారు.
హైదరాబాద్‌లో మంగళవారం మధ్యాహ్నం నుంచి మళ్లీ వర్షం మొదలైంది. బంజారాహిల్స్, జూబ్లీహిల్స్, హైటెక్ సిటీ, గచ్చిబౌలి, జేఎన్టీయూ, కుకట్‌పల్లి, మియాపూర్ వంటి పలు ప్రాంతాల్లో భారీ వర్షం కురిసింది. దీంతో రోడ్లపై వర్షపు నీరు నిలిచిపోయి ట్రాఫిక్‌కు తీవ్ర అంతరాయం ఏర్పడింది. ఆఫీసుల నుంచి ఇంటికి వెళ్లే సమయం, వినాయక నిమజ్జనాల కారణంగా ప్రధాన రోడ్లపై భారీగా ట్రాఫిక్ జామ్‌లు నెలకొన్నాయి.
HYD: జేఎన్‌టీయూలో గౌరీనందనుడి నవరాత్రి ఉత్సవాలను పురస్కరించుకుని స్టూడెంట్స్ ప్రొటెక్షన్ ఫోరం ఆధ్వర్యంలో రంగోలి పోటీలు నిర్వహించారు. ఈ పోటీల్లో 40 టీమ్‌లు పాల్గొన్నాయి. విజేతలకు నగదు బహుమతులు అందజేశారు. మొదటి బహుమతిగా రూ.1016, రెండో బహుమతిగా రూ.716, మూడో బహుమతిగా రూ.516, నాలుగో బహుమతిగా రూ.316 ఇచ్చారు. ఈ కార్యక్రమానికి ప్రొఫెసర్ అరుణ కుమారి ముఖ్య అతిథిగా హాజరయ్యారు.
HYD: టీపీసీసీ ఉపాధ్యక్షుడు, కూకట్‌పల్లి కాంగ్రెస్ పార్టీ ఇన్‌ఛార్జ్ బండి రమేష్ కూకట్‌పల్లిలోని గణేష్ మండపాలను సందర్శించారు. ప్రశాంత్ నగర్, ఖైతలాపూర్‌లలో ఏర్పాటు చేసిన వినాయక విగ్రహాలకు ఆయన ప్రత్యేక పూజలు చేశారు. అనంతరం అన్నసంతర్పణ కార్యక్రమాలను ప్రారంభించారు. ఈ సందర్భంగా నిర్వాహకులను ఆయన అభినందించారు. ఈ పండుగలో ప్రజలందరూ కలిసిమెలసి ఉండాలని ఆయన ఆకాంక్షించారు.
వికారాబాద్: కాళేశ్వరం ప్రాజెక్టుపై కాంగ్రెస్ ప్రభుత్వం డైవర్షన్ రాజకీయాలు చేస్తోందని బీఆర్ఎస్ రాష్ట్రమీడియా ప్రతినిధి పంజుగుల శ్రీశైల్ రెడ్డి అన్నారు. తాండూరులోని అంబేద్కర్ చౌరస్తా వద్ద బీఆర్ఎస్ ధర్నా నిర్వహించింది. హామీలు అమలు చేయడంలో విఫలమైన కాంగ్రెస్ ప్రభుత్వం ప్రజలను తప్పుదోవ పట్టించేందుకు ప్రయత్నిస్తోందని శ్రీశైల్ రెడ్డి విమర్శించారు. పీసీఘోష్ నివేదిక బూటకమని, సీఎం రేవంత్ రెడ్డి అబద్ధాలతో పాలన చేస్తున్నారని ఆరోపించారు.
HYD: కాళేశ్వరం ప్రాజెక్టుపై సీబీఐ విచారణకు నిరసనగా సికింద్రాబాద్‌లో బీఆర్ఎస్ శ్రేణులు ఆందోళన చేపట్టారు. సీతాఫల్‌మండి వద్ద బీఆర్ఎస్ కార్పొరేటర్లు బైక్ ర్యాలీ నిర్వహించారు. ఈ సందర్భంగా కాంగ్రెస్ దిష్టిబొమ్మను దహనం చేసేందుకు ప్రయత్నించగా, పోలీసులు వారిని అడ్డుకుని చిలకలగూడ పోలీస్ స్టేషన్‌కు తరలించారు. కాళేశ్వరంలో అవినీతి జరగలేదని, కక్షపూరితంగా వ్యవహరిస్తున్నారని బీఆర్ఎస్ నాయకులు పేర్కొన్నారు.
HYD: సోమాజిగూడలోని హోటల్ కత్రియాలో ‘మిస్, మిసెస్ బెలెజా తెలంగాణ గ్రాండ్ ఫినాలే సీజన్-2’ ఘనంగా జరిగింది. ఈపోటీలో డాక్టర్లు, ఐటీ ఉద్యోగులు, ఫ్యాషన్ డిజైనర్లు, గృహిణులతో సహా 20 మంది ఫైనలిస్టులు పాల్గొన్నారు. ‘మిస్’ కేటగిరీ విజేతగా డి.కావ్యాంజలి, ఫస్ట్ రన్నరప్‌‌గా కందకట్ల ప్రత్యూష నిలిచారు. ‘మిసెస్’ కేటగిరీ విజేతగా ఇందిరా దేవి, ఫస్ట్ రన్నరప్‌‌గా డా. పి.నిఖిలా రెడ్డి ఎంపికయ్యారు.
