HYD : ఫార్ములా ఈ కార్ రేస్ కేసులో A2గా ఉన్న IAS అధికారి అరవింద్ కుమార్ ACB ఎదుట హాజరయ్యారు. ఈ కేసుకు సంబంధించి మూడోసారి ఏసీబీ విచారణకు ఆయన వచ్చారు. ఫార్ములా ఈ కార్ రేస్ కేసులో నిధుల బదలాయింపులో అరవింద్ కుమార్ కీలక పాత్ర పోషించారని ACB గుర్తించింది. HMDA డైరెక్టర్‌గా పని చేస్తూ నిధులను మళ్లించినట్టుగా ఆరోపణలు ఉన్నాయి.
HYD: శంషాబాద్ ఎయిర్‌పోర్టులో మూడు విమానాలు అత్యవసర ల్యాండింగ్ అయ్యాయి. ముంబైలో వాతావరణం సరిగా లేని కారణంగా ఛత్రపతి శివాజీ ఎయిర్‌పోర్టుకు వెళ్లాల్సిన ఢిల్లీ-ముంబై, చెన్నై-ముంబై, లక్నో-ముంబై విమానాలను శంషాబాద్‌లో ఎమర్జెన్సీ ల్యాండింగ్ చేశారు.
మేడ్చల్: జూలై 9న దేశవ్యాప్త సమ్మె కారణంగా కాప్రా సర్కిల్‌లో జీహెచ్‌ఎంసీ పారిశుద్ధ్య కార్మికులు విధులకు హాజరు కావడంలేదని తెలిపే వినతిపత్రాన్ని కాప్రా బీఆర్‌టీయూ అధ్యక్షుడు కురుమన్న, పారిశుద్ధ్య కార్మికులతో కలిసి సమర్పించారు. డిప్యూటీ కమిషనర్ అందుబాటులో లేకపోవడంతో.. ఏఎంహెచ్‌ఓ మధుసూదన్ రావు, ఎస్ఎస్ సుదర్శన్‌లకు వినతిపత్రం అందజేశారు.
HYD: సనత్ నగర్ రాజరాజేశ్వరి నగర్‌లో ఓ ఇంట్లో ఫ్రిజ్ పేలడంతో భారీ అగ్నిప్రమాదం సంభవించి, ఇల్లు పూర్తిగా దగ్ధమైంది. అగ్నిమాపక సిబ్బంది మంటలను అదుపు చేశారు. ప్రాణనష్టం లేకపోవడంతో స్థానికులు ఊపిరి పీల్చుకున్నారు. మాజీ మంత్రి తలసాని శ్రీనివాస్ యాదవ్ బాధితులను పరామర్శించి, తక్షణ ఆర్థిక సహాయం అందజేస్తామని ప్రకటించారు.
HYD: నగరంలో పనిచేసే మాన్సూన్ ఎమర్జెన్సీ టీమ్‌లు 24 గంటలు షిఫ్టుల వారీగా అందుబాటులో ఉంటూ.. ఎప్పటికప్పుడు అప్రమత్తంగా ఉండాలని హైడ్రా కమిషనర్ రంగనాథ్ సూచించారు. మాన్సూన్ ఎమర్జెన్సీ టీమ్స్ కాంట్రాక్టర్లతో సమావేశం నిర్వహించారు. ఎక్కడ ఎలాంటి సమస్య తలెత్తుతుందో, దానికి పరిష్కారం ఏమిటో తెలిసి ఉండాలని పేర్కొన్నారు. వరద నీరు రహదారులు, నివాసాలను ముంచెత్తకుండా జాగ్రత్త పడాలన్నారు.
మేడ్చల్: చర్లపల్లి డివిజన్‌లో ఇందిరా క్యాంటీన్ స్థాపన కోసం జీహెచ్‌ఎంసీ స్టాండింగ్ కమిటీ సభ్యురాలు, కార్పొరేటర్ బొంతు శ్రీదేవి యాదవ్ అధికారులతో కలిసి ప్రాంత పరిశీలన నిర్వహించారు. కుషాయిగూడ ఆటో, బస్టాండ్, చక్రిపురం చౌరస్తా, ఐజీ కాలనీ, చర్లపల్లి పోలీస్ స్టేషన్, రైల్వే స్టేషన్ సర్వే చేశారు. ఈ కార్యక్రమంలో సీపీ కృష్ణమోహన్, ఏఏంఓ హెచ్ మధుసూదన్, శానిటరీ సూపర్వైజర్ సుదర్శన్,తదితరులు పాల్గొన్నారు.
మేడ్చల్: కుత్బుల్లాపూర్ నియోజకవర్గం జీడిమెట్ల ఫస్ట్ అవెన్యూ కాలనీవాసులు కమ్యూనిటీ హాల్ నిర్మాణానికి నిధుల కోసం మల్కాజిగిరీ ఎంపీ ఈటల రాజేందర్‌ను కలిశారు. 200 గజాల ఖాళీ స్థలంలో హాల్ నిర్మాణం కోసం వినతిపత్రం అందజేశారు. కాలనీ అధ్యక్షుడు బొక్క ప్రభాకర్ రెడ్డి మాట్లాడుతూ.. కార్యక్రమాలు, వృద్ధుల అవసరాలకు హాల్ అవసరమన్నారు.ఎంపీ సానుకూలంగా స్పందించారని, నిధుల కేటాయింపుకు కృషిచేస్తానని హామీ ఇచ్చినట్లు వారు తెలిపారు.
