అమరావతిలో హడ్కో కన్వెన్షన్ సెంటర్ ఏర్పాటుకు హడ్కో బోర్డు ఆమోదం తెలిపింది. ఈవిషయాన్ని కేంద్ర పట్టణాభివృద్ధిశాఖ మంత్రి మనోహర్ లాల్‌ఖట్టర్, కేంద్రమంత్రి పెమ్మసాని చంద్రశేఖర్‌కు లేఖ ద్వారా తెలిపారు. గుంటూరులో సీఆర్డీఏ కేటాయించిన 8 ఎకరాలను ఎకరం రూ.4కోట్ల చొప్పున కొనుగోలు చేయడానికి బోర్డు అనుమతించింది. మొత్తం 10ఎకరాల్లో ఈకేంద్రాన్ని అభివృద్ధి చేయడానికి ఆమోదం లభించింది. ఈవివరాలను పెమ్మసాని చంద్రశేఖర్ ‘ఎక్స్’ వేదికగా వెల్లడించారు.
శ్రీశైలం ఎమ్మెల్యే బుడ్డ రాజశేఖర్ రెడ్డిపై ముఖ్యమంత్రి చంద్రబాబు నాయుడు ఆగ్రహం వ్యక్తం చేశారు. శ్రీశైలం ఘాట్ రోడ్డులో అటవీ సిబ్బందిపై దాడి జరిగిందని వచ్చిన వార్తలపై ఆయన ఆరా తీశారు. అటవీ సిబ్బందితో ఎమ్మెల్యే గొడవపడినట్లు వచ్చిన ఆరోపణల నేపథ్యంలో సీఎం చంద్రబాబు సీరియస్‌గా స్పందించారు. ఈ ఘటనపై అధికారుల నుంచి పూర్తి వివరాలు తెలుసుకుని, తప్పు ఎవరిదైనా కేసు నమోదు చేయాలని ఆదేశించారు. దీంతో పోలీసులు కేసు నమోదు చేశారు.
కృష్ణా: చల్లపల్లి మండలం కొత్తమాజేరులో పీఏసీఎస్ అధ్యక్షుడిగా తిరుమలశెట్టి బాల నాగేశ్వరరావు ప్రమాణ స్వీకారం చేశారు. ముఖ్య అతిధులుగా మండలి వెంకట్రామ్, ఏపీ అగ్నికుల క్షత్రియ కార్పొరేషన్ చైర్మన్ చిలకలపూడి పాపారావు హాజరయ్యారు. కూటమి ప్రభుత్వం రైతుల సంక్షేమమే ధ్యేయంగా పని చేస్తోందని వెంకట్రావ్ తెలిపారు. ప్రభుత్వం రైతులకు అందుబాటులో ఉండే నాయకులతో సొసైటీ త్రిసభ్య కమిటీలు ఏర్పాటు చేసినట్లు తెలిపారు.
ఎన్టీఆర్: నందిగామ పురపాలక సంఘ కార్యాలయంలో మున్సిపల్ ఛైర్‌ పర్సన్ మండవ కృష్ణకుమారి అధ్యక్షతన ఇంజనీరింగ్ సెక్రటరీల సమావేశం జరిగింది. ప్రధానమైన మంచినీటి సమస్యను, వీధిలైట్ల నిర్వహణను ఎల్లప్పుడూ పర్యవేక్షిస్తుండాలని అధికారులకు సూచించారు. అలాగే ప్రజలకు అన్నివేళలా అందుబాటులో ఉండాలని చెప్పారు. ఈ కార్యక్రమంలో పట్టణ పరిధిలోని ఇంజనీరింగ్ సెక్రటరీలు పాల్గొన్నారు.
ఎన్టీఆర్: మైలవరం మండలం బాడవ గ్రామంలో విషాద ఘటన చోటు చేసుకుంది. పోలీసులు తెలిపిన వివరాల ప్రకారం.. గ్రామానికి చెందిన మహాలక్ష్మి(55) తన ఇంటి బాత్రూంలో మృతి చెందినట్లు చెప్పారు. ఘటన స్థలాన్ని పరిశీలించి అనుమానాస్పద మృతిగా కేసు నమోదు చేశామన్నారు. పోస్టుమార్టం నిమిత్తం మైలవరం ప్రభుత్వాసుపత్రికి తరలించినట్లు తెలిపారు.
ఏలూరు: చదువుల్లోనే కాదు ప్రతిరోజు బడికి హాజరుకావడంలో కూడా రాణిస్తున్న విద్యార్థులకు ఆర్ధిక సహాయం చేసి ప్రోత్సహిస్తున్నట్లు మంత్రి కొలుసు పార్థసారధి కుమారుడు నితిన్ కృష్ణ తెలిపారు. చాట్రాయి మండలం పోలవరం హైస్కూల్‌కు గత విద్యా సంవత్సరంలో ఒక్కరోజు కూడా బడి మానకుండా హాజరైన విద్యార్థులకు ఆయన బుధవారం నగదు అందజేశారు. ఒక్కొక్కరికి రూ.5వేలు చొప్పున 15 మందికి రూ. 75వేలు బహుమతిగా ఇచ్చారు.
