Locations: Krishna

కృష్ణా: ప్రకాశం బ్యారేజీ నుంచి కృష్ణానదికి వరద ప్రవాహం ఉధృతంగా ఉన్నందున అధికారులందరూ వారి ప్రధాన కార్యస్థానాల్లో అందుబాటులో అప్రమత్తంగా ఉండి అన్ని ముందస్తు జాగ్రత్త చర్యలు చేపట్టాలని జిల్లా కలెక్టర్ బాలాజీ ఆదేశించారు. మంగళవారం సాయంత్రం వరద పరిస్థితులపై జిల్లా అధికారులు, క్షేత్రాధికారులతో గూగుల్ మీట్ నిర్వహించారు. వరదలు నియంత్రణకు వచ్చేంతవరకు ఎవరికి ఎటువంటి సెలవులు ఉండవని స్పష్టం చేశారు.

ఎన్టీఆర్: రాష్ట్ర నైపుణ్యాభివృద్ది సంస్థ ఆధ్వర్యంలో మెగా జాబ్ మేళాకు సంబంధించిన స‌మ‌గ్ర స‌మాచార పోస్ట‌ర్ల‌ను ఎమ్మెల్యే తంగిరాల సౌమ్య ఆవిష్క‌రించారు. ఈ సంద‌ర్బంగా ఎమ్మెల్యే మాట్లాడుతూ..నందిగామలోని KVR కాలేజీ ప్రాంగ‌ణంలో ఈ నెల 23వ తేదీ ఉద‌యం 9 గంట‌ల నుంచి సాయంత్రం 5 గంట‌ల వ‌ర‌కు మెగా జాబ్ మేళా జ‌రుగుతుంద‌ని అన్నారు. ఈ జాబ్ మేళాను యువ‌త స‌ద్వినియోగం చేసుకోవాలని కోరారు.

ఎన్టీఆర్: కంచికచర్ల మండలం గని ఆత్కూరు, కొత్తపేట గ్రామాల పల్లపు ప్రాంతంలో గత వారంగా కురుస్తున్న భారీ వర్షాలతో పత్తి, పెసర పంటలు నీటితో నిండిపోయాయి. లోతట్టు ప్రాంతాల్లో పత్తి పంటలు పూర్తిగా నీటిలో మునిగి, ఆకులు నల్లగా మారుతున్నాయని రైతులు తీవ్ర ఆవేదన వ్యక్తం చేస్తున్నారు.

కృష్ణా: మహిళలకు ఉచిత ఆర్టీసీ బస్సు ప్రయాణ సౌకర్యం తిరుమల కొండపై వరకూ పొడిగించినట్లు ఏపీఎస్ ఆర్టీసీ ఛైర్మన్ కొనకళ్ల నారాయణరావు ప్రకటించారు. మంగళవారం అవనిగడ్డలోని ఆర్టీసీ బస్టాండును ఎమ్మెల్యే మండలి బుద్ధప్రసాద్, ఆర్టీసీ రీజనల్ మేనేజర్ వెంకటేశ్వర్లులతో కలిసి ఆకస్మికంగా పరిశీలించారు. బస్టాండు, బస్సుల్లో మహిళా ప్రయాణికులతో మాట్లాడి వారి సంతోషాన్ని పంచుకున్నారు. అనంతరం బస్టాండులో మహిళల, పురుషుల మరుగుదొడ్లను పరిశీలించారు.