Locations: నాగర్ కర్నూల్

నాగర్‌కర్నూల్: బిజినేపల్లి మండలం వట్టెంలోని జవహర్ నవోదయ విద్యాలయంలో 2026-27 సంవత్సరానికి గాను 6వ తరగతి ప్రవేశాలకు దరఖాస్తులను ఆహ్వానిస్తున్నట్లు ప్రిన్సిపాల్ భాస్కర్‌కుమార్ ప్రకటనలో తెలిపారు. ఉమ్మడి మహబూబ్‌నగర్ జిల్లాకు చెందిన ప్రస్తుతం 5వ తరగతి చదువుతున్న విద్యార్థులు జులై 29వరకు ఆన్‌లైన్‌లో దరఖాస్తు చేసుకోవాలన్నారు. మరిన్ని వివరాలకు నవోదయ విద్యాలయ వెబ్ సైట్‌ను చూడాలన్నారు.

నారాయణపేట: దామరగిద్ద ప్రైమరీ స్కూల్ హెచ్‌.ఎం అలివేలుమంగ(46) అనుమానాస్పద స్థితిలో మృతి చెందినట్లు ఎస్సై వెంకటేశ్వర్లు తెలిపారు. అపస్మారక స్థితిలో ఇంటిలో పడి ఉన్న ఆమెను, భర్త ఆసుపత్రికి తీసుకెళ్లగా మృతి చెందినట్లు వైద్యులు నిర్ధారించారు. మృతురాలి అన్న రమణ అనుమానంతో ఫిర్యాదు చేయడంతో పోలీసులు కేసు నమోదు చేసి దర్యాప్తు చేస్తున్నారు.

జోగులాంబ గద్వాల: ఉండవెల్లి మండలం పుల్లూరు టోల్ ప్లాజా వద్ద విజయవాడ నుంచి హైదరాబాద్‌కు అక్రమంగా తరలిస్తున్న 70కి పైగా ఆవులు, ఎద్దులను పోలీసులు పట్టుకున్నారు. బక్రీద్ సందర్భంగా ఈ వాహనం స్వాధీనం చేసుకున్నట్లు తెలిపారు. గోవులను మానవపాడు ఉన్నత పాఠశాలలో వదిలినట్లు, ఆసక్తిగల రైతులు సంరక్షిస్తే వారికి అప్పగిస్తామని వైద్యాధికారులు పేర్కొన్నారు.

జోగులాంబగద్వాల: జిల్లా కేంద్రంలోని హమాలీ కాలనీలో సోమవారం అర్థరాత్రి మొసలి కలకలం రేపింది. అక్కడున్న కుక్కలు పెద్ద ఎత్తున అరిచాయి. దీంతో గమనించిన కాలనీవాసులు మొసలిని చూసి చుట్టుపక్కల ఇళ్లల్లో ఉన్న కాలనీవాసులతో కలిసి దానిని తాళ్లతో బంధించారు. అటవీశాఖ అధికారులు వచ్చి మొసలిని తీసుకెళ్లాలని కాలనీవాసులు కోరుతున్నారు.

వనపర్తి: జూరాల జలాశయంలోకి వరద ప్రవాహం కొనసాగుతోంది. 24వేల క్యూసెక్కుల వరద చేరుతోంది. జలాశయంలో నీటినిల్వ 8.697 టీఎంసీలుగా ఉంది. నీటినిల్వ గరిష్ఠ స్థాయికి చేరువలో ఉండటంతో జలవిద్యుదుత్పత్తికి 27వేల క్యూసెక్కులు వదులుతున్నారు. నెట్టెంపాడు లిఫ్టు 750 క్యూసెక్కులు విడుదల చేస్తున్నారు. కర్ణాటకలోని ఆలమట్టి ప్రాజెక్టులోకి వరద ప్రవాహం తగ్గింది. 17వేల క్యూసెక్కుల ప్రవాహం చేరుతోందని అధికారులు వెల్లడించారు.