నారాయణపేట: మక్తల్ బస్టాండ్ చిన్నపాటి వర్షానికే మినీ చెరువులా మారుతోంది. అధికారుల నిర్లక్ష్యం, గుంతల్లో మొరం వేసి మళ్ళీ తీయడం వల్ల ఈ సమస్య ఏర్పడింది. దీంతో ప్రయాణికులు, వ్యాపారులు, వాహనదారులు తీవ్ర ఇబ్బందులు పడుతున్నారు. అధికారులు తక్షణమే ఈ సమస్యను పరిష్కరించాలని స్థానికులు కోరుతున్నారు.
మహబూబ్‌నగర్: ఉమ్మడి పాలమూరు జిల్లాలో వినాయక చవితి ఉత్సవాలు ఘనంగా ప్రారంభమయ్యాయి. మండపాలు, ఇళ్లలో గణనాథుని పూజల కోసం ప్రజలు అవసరమైన సామగ్రి కొనుగోలు చేయడానికి బయటికి రావడంతో ప్రధాన కూడళ్లు కిటకిటలాడుతున్నాయి. సాయంత్రం పూజలకు మండపాలు సిద్ధమవుతున్నాయి. ఈ పండుగ వాతావరణం జిల్లా అంతటా కనిపిస్తోంది.
మహబూబ్‌నగర్: జూరాల ప్రాజెక్టుకు భారీగా వరద వచ్చి చేరుతుంది. ప్రాజెక్టు 22 గేట్లు ఎత్తి 3,51,504 క్యూసెక్కుల నీటిని దిగువకు అధికారులు విడుదల చేస్తున్నారు. ప్రస్తుతం నీటిమట్టం 317.900 మీటర్లు (8.415 టీఎంసీలు)గా ఉంది. ప్రాజెక్టుకు 2,60,000 క్యూసెక్కుల వరద ప్రవాహం కొనసాగుతోంది. 5 పవర్ హౌస్‌లలో విద్యుత్ ఉత్పత్తి జరుగుతోంది.
ఉమ్మడి పాలమూరు జిల్లా కలెక్టర్ కార్యాలయంలో మంత్రి జూపల్లి కృష్ణారావు అధ్యక్షతన యూరియా సరఫరాపై సమీక్ష నిర్వహించారు. ఈ సందర్భంగా నాగర్‌కర్నూల్ ఎమ్మెల్యే కూచుకుళ్ళ రాజేష్ రెడ్డి తన నియోజకవర్గానికి యూరియా ఎక్కువగా కేటాయించాలని కోరారు.
నియోజకవర్గ వ్యాప్తంగా రైతులు పత్తి, మొక్కజొన్న, కందులు, మినుములు, వరి అధికంగా సాగు చేశారని మంత్రి దృష్టికి తీసుకెళ్లారు. ప్రతీ రైతుకు కావాల్సినంత యూరియా సరఫరా చేస్తామని మంత్రి హామీ ఇచ్చినట్టు ఆయన వెల్లడించారు.
మహబూబ్‌నగర్: ఎన్నికల ముందు ఇచ్చిన హామీ ప్రకారం ఫించన్లు పెంచడం చేతకాకపోతే సీఎం రేవంత్ రెడ్డి తన పదవికి రాజీనామా చేయాలని మందకృష్ణ మాదిగ డిమాండ్ చేశారు. వికలాంగుల హక్కుల పోరాట సమితి, చేయూత పెన్షన్ దారుల ఆధ్వర్యంలో జడ్చర్ల నియోజకవర్గంలో జరిగిన సమావేశంలో తీవ్ర స్థాయిలో మండిపడ్డారు. ఫించన్ల పెంపును డిమాండ్ చేస్తూ సెప్టెంబర్ 9న పరేడ్ గ్రౌండ్‌లో లక్షలాది మందితో మహా గర్జన నిర్వహిస్తున్నామని తెలిపారు.
మహబూబ్‌నగర్: జడ్చర్ల ఎమ్మెల్యే అనిరుధ్ రెడ్డి పొలంలోకి దిగి రైతులతో కలిసి యూరియా చల్లారు. నవాబ్‌పేట్ మండల పర్యటనలో భాగంగా చౌడూరు గ్రామాన్ని సందర్శించారు. గ్రామంలోని రైతు పొలానికి వెళ్లి యూరియా చల్లి వారి సమస్యలు తెలుసుకున్నారు. ప్రభుత్వం రైతులను అన్ని విధాలుగా ఆదుకుంటుందని భరోసా ఇచ్చారు. విపక్షాల ఆరోపణలు నమ్మి ఆందోళన చెందవద్దని సూచించారు.
నాగర్‌కర్నూల్: ఇందిరమ్మ ఇళ్ల నిర్మాణాన్ని వేగవంతం చేయాలని జిల్లా కలెక్టర్ బాదావత్ సంతోష్ అధికాలను ఆదేశించారు. మంగళవారం బిజినపల్లి మండల కేంద్రంలోని గాంధీనగర్ కాలనీలో నిర్మిస్తున్న ఇందిరమ్మ లబ్ధిదారు బీసం కృష్ణవేణి ఇందిరమ్మ ఇంటిని పరిశీలించారు. గ్రామంలో మొత్తం ఎన్ని ఇండ్లు నిర్మాణంలో ఉన్నాయని తెలుసుకున్నారు. జిల్లా కలెక్టర్ వెంట బిజినపల్లి తహసిల్దార్ మున్నూరుద్దీన్ ఎంపీడీవో కాంతయ్య పాల్గొన్నారు.
నాగర్‌కర్నూల్: వినాయక చవితి సందర్భంగా జిల్లా కలెక్టర్ బాదావత్ సంతోష్ ప్రజలకు శుభాకాంక్షలు తెలిపారు. గణనాథుడి పూజ ద్వారా ప్రతి ఇంటికి సుఖసంతోషాలు, శాంతి, ఐశ్వర్యం కలగాలని కోరుకుంటున్నానని పేర్కొన్నారు. పర్యావరణానికి హాని కలగకుండా పండుగ జరుపుకోవాలని పిలుపునిచ్చారు. ప్లాస్టర్ ఆఫ్ పారిస్ విగ్రహాలు, హానికర రంగులు వాడటం నీరు కలుషితం అవుతుందని అన్నారు. అందుకే మట్టి విగ్రహాలను పూజించాలని సూచించారు.
నాగర్ కర్నూల్: మంతటి గ్రామంలో ఇటీవల కురిసిన వర్షాలకు పలు ఇళ్లు కూలిపోయాయి. వాటిని సీపీఎం మండల కార్యదర్శి పొదీల రామయ్య పరిశీలించారు. నష్టపోయిన వారికి పరిహారం ఎప్పుడు ఇస్తారని ప్రభుత్వాన్ని ప్రశ్నించారు. గ్రామంలో రోడ్లు, వీధిలైట్లు, డ్రైనేజీలు సరిగా లేకపోవడం వల్ల ప్రజలు తీవ్రమైన ఇబ్బందులు పడుతున్నారని అన్నారు.
నాగర్ కర్నూల్ జిల్లా కేంద్రం కేసరి సముద్రం సమీపంలోని ఎండబెట్ల బ్రిడ్జి వద్ద మంగళవారం రోడ్డు ప్రమాదం జరిగింది. బైకు అదుపుతప్పి కల్వర్టును ఢీకొని కాలువలో పడిపోయింది. ఘటనలో ఓ వ్యక్తికి గాయాలు అయ్యాయి. ప్రమాదానికి సంబంధించి మరిన్ని వివరాలు తెలియాల్సి ఉంది.
